• :: Nagusia
• :: Info
• :: Ostiralekoa
• :: Irauli Uhinak
• :: Argitaratu
• :: Guneak
• :: Arbela
• :: Gozategi
• SEXtabaida
• Erreportajea
• Izarapeko Aholkua
• Korapiloa
• :: Kalaportu
• :: Musikale
• :: Iritzia
• :: HIka Mika
• :: Ttak!
• :: Peru
• :: Lanabes Kutxa
• :: Auzolana
• :: Zerbitzuak
• :: e-Posta
• :: Ostalaria

Gozategi › Elkarrizketa

Asko ligatzen da IAko kideen artean, militantziak laguntzen du

Ikasle Abertzaleakeko Oihana eta Egoitzi elkarrizketa

Gaztesarea: Nola eta noiz hasi zineten zuen sexualitatearen kontzientzia hartzen?
Egoitz: Kontzientzia osoa nik uste dut ez dela sekula hartzen, baina adin bat esatearren 13 esango dut.
Oihana: Nik ere antzera, inoiz ez da kontzientzia osoa hartzen bukatzen baina, 14-15 urterekin esango nuke neuk ere.

GS: Zuen gorputzaren ezagutza nolakoa izan zen, oroitzen al zarete? Dutxan, biluzik zeundeten uneetan…
E: Oroitzen naiz halako egoeretaz, baina sexualitatearen kontzientzia izan arte nahiko prozesu naturala da eta ez diozu halako garrantziarik ematen.
O: Oroitzapen bat esatearren ez daukat, baina nik uste sexualitatearekin bezala, etengabe egiten den zerbait dela inoiz ez da sekula bukatzen norberaren gorputza ezagutzen. Poliki poliki egiten den zerbait da eta esperientziarekin joaten da norbera bere gorputzarengan konfidantza hartzen, gehiago maitatzen…

GS: Batzutan sexualitatearen munduan errepresioa sartzen da, ikuteagatik, masturbatzeagatik guraso edo irakasleen errietak jasotzen ditugu. Zuen bizitzan jaso al duzue halakorik?
O: Nik halako jarrera errepresibo bortitzik ez dut gogoratzen, baina, era sutilago batean, ezkutatzen diguten eta ezkutarazten dizuten egoera bat bizi izan dut. Ohartzen zara, gaia ez dela beste gai bat bezain era naturalean lantzen, izkutatu egiten dela, eta lehen sexu harremanetan gaizki egiten ari zarenaren pertzepzioa ere sentitzen duzu.

GS: Eta inoiz harrapatu al zaituzte egoera konprometituren batetan, masturbatzen, edo zuen gorputza ikutzen…
E: Ez, agian autoerrepresioa hainbestekoa izan da momentu horiek oso ondo ezkutatzen ikasten duzula, eta nik ez dut halako egoerarik bizi.

GS: Nola baloratzen duzue etxean gurasoek eta ikastetxean irakasleek eskainitako sexu hezkuntza?
O: Erakutsi ez dizute ezer erakusten eta dena zeure kabuz ikasi behar izaten duzu. Ez etxean eta ezta hezkuntza sisteman ez dute sexualitatearen inguruan lasaitasunez hitzegiten, zerbait anormala da eta ez dago naturaltasunik gai horren inguruan hitzegiteko.
E: Nik uste dut gurasoen partetik bi poloak ezagutu ditut. Batzuetan nik baino lotsa handiagoa pasatzen zuen hitzegiterako orduan eta beste batzuetan naturalegi hitzegiten zen lotsa nik pasatzen nuelarik. Lasaitasunez nik uste orain hasi naizela hitzegiten, beno, hemen grabagailuaren aurrean izan ezik.

GS: Sexualitatearen kontzientzia hartzen hasten garen garaia nerabezaroa izaten da, batez ere. Lagunen artean hitzegin al duzue nerabezaro garaian? Nolakoak ziren elkarrizketa horiek?
O:Berriz esan behar dut errepresio zuzenik jaso ez arren, zeharka jasotakoa handia dela eta lagun artean hitzegiteko ere ez dut naturaltasunik ezagutu. Ez dut neure buruarekin segurtasunik sentitu era aske batean sexualitatearen inguruan hitzegiteko. Norberaren autoerrepresioa gainditu arte, norberak bere buruaren kontzientzia hartu arte ez du lasai hitzegiten gai horren inguruan. Hitzegin bai agian, baina ez era natural batean; ez, egin duzuna kontatzeko, baina, era harroputz batean eta halakoak…
E: Askotan mutilen artean asko hitzegiten dela eta era naturalagoan hitzegiten denaren ustea dago, baina, nik uste asko hitzegin agian egiten dela, baina ezer askorik esan gabe. Gainera ni ez naiz hiztun horietakoa izan, eta agian entzun gehiago egin dut. Nerabezaroan formak asko zaindu gabe hitzegiten da askotan, gainera.

GS: Agian neska eta mutilek dauzkagun esterotipoen arabera hitzegiten dugu sexualitatearen inguruan. Neskoi maitasunaren ikurra eransten zaigu eta orduak pasatzen ditugu gustatzen zaigun pertsonari buruz hitzegiten, eta agian mutilek lortutako sexu erronka berrien inguruan lehian aritzen dira. Hala da? Ala hauek ere esterotipoak dira?
O: Bai, horretaz asko hitzegiten da, baina sentimenduen ikuspegitik hitzegiten da asko. Baina, ez sexu praktikari lotuta egin duzunaz, egin nahi duzunaz eta abar. Maitasunaren arlo horretan barrena lasai hitzegiten dugu emakumeok, eta agian esterotipoak ere badira, baina mutilen artean egia da lortu dutenaz edo egin dutenaz hitzegitea arruntagoa dela. Adibidez masturbazioaren kasuan askoz ere onartuago dago masturbazioaren inguruan hitzegitea. Nire ikastetxean adibidez errekreoan mutilak komunera joaten ziren eta neskak ez. Askoz onartuago dago mutilen inguruan masturbazioaz hitzegitea. Era horretan neskak bigarren maila batean geratzen dira.
E: Nik egia esan ez dut ezagutu eskolan komunera joate hori, baina bai egia da hitzegin errazago hitzegiten dela mutilen artean. Hala ere, nahiko era esterotipatuan hitzegiten da, masturbazioak norberari sentitzen dion zirraraz eta norberak bere gorputzarekin ikasten duenaz, ez pentsa lasaitasunez hitzegiten denik, oso era kuantitatiboan hitzegiten da: zenbat aldiz egunean, noiz iritsi nahi duzun zerbait berria probatzera, zenbat denboran…

GS: Nola bizi izan zenuten lehenengo muxua? Gogoratzen baduzue…
O: Nik uste dut garrantzi gehiegi ematen zaiola lehenengoari beti: lehenengo muxuari, lehenengo harreman sexualari… Eta nik momentu honetan ez dut ezta gogoratzen nola izan zen nire lehenengo muxua, eta zer den ere ez dakit, zeren lehenengo muxua suposatzen dut amak eman zidana izango zela. Nik uste garrantzi gehiegi ematen zaiola eta gainera urteak pasa hala lehenengoa ahaztu egiten dela, zeren lehenengoa nik uste ez dela inoiz hoberena izaten.
E: Oihanak esandakoa egia dela aitortu behar dut. Hala ere, nik gogoratzen dut nire lehenengo muxua, baina agian espektatibak oso desberdinak izan zirelako gogoratzen dut. Behin errepikatuta nik uste dena hobetzen joaten dela.

GS: Txikitatik bikotearen ideia irakatsi digute, sexualitatearen praktika eta bikotea batera doaz gure jendarte honetan. Gure galdera iraultzaile garenontzat honakoa da, fideldatsuna zuek nola ulertzen duzue?
E: Nik fideltasuna ulertzen dut sentimendu bezala, baina egia esan ez diot zentzurik hartzen. Zaila da. Nik uste fideltasuna akordio bat dela, ez dagoela markatuta zein ezaugarri izan behar dituen, beno, jendartean bai dagoela markatuta, baina ez duela zertan horrela izan. Nire ustetan guztiz moladagarria da. Kontua da askotan erosotasunagatik ez dela ezer akordatzen eta beraz, gizartean ezarritako irizpideak onartzen direla. Honek aurreiritziak dakartza, sentimendu jeloskorrak, batzuetan zentzugabeak iruditzen zaizkizunak zeure buruan baina kontrolaezinak direnak, are zentzugabeagoak iruditzen zaizkizunak bestearengan, baina seguru kontrolatu ezingo dituzunak… baina nire ustetan garrantzitsuena da akordio hori nola adostu, eta nik teorian eta praktikan gaur egun fideltasuna ulertzen den bezala ez diot zentzurik hartzen.
O: Niretzako gai zaila da hau, bai esplikatzerako orduan eta baita teoria eta praktikaren artean dagoen amildegiagatik. Nik uste Egoitzek esan duen ildotik, teoria mailan jeloskor jartzen zarenean konfidantza falta bat dagoela: zu pertsona batekin zaudenean bera beste batekin egon arren ez ditu zertan zurekiko dituen sentimenduak aldatu behar. Baina jeloskor sentimendua pertsona hori galtzeko beldurra izatea da. Nik uste dut maitasuna eta sexua ez doazela batera, baina niretzako uztartzen direnean da LA BONBA. Ni ados nago fidelasuna kontrolatzeko era bat dela: duzuna ez galtzeko eta arriskuan ez jartzeko duzun erosotasuna. Baina, hori teoria mailan, zeren gero praktikan, bizitzan baloratua izateko norbait izan behar duzu ondoan,…eta jendarteak eragin handia du.
E: Ez da bakarrik pertsona bat galtzeko beldurra, nik uste dut ez dela nire bikotea beste batekin doala, baina ni maite banau berdin diola, baizik eta ni maite al nau bera baino gehiago? Hor lehiakortasun bat sortzen da, izan nahi duzu ez bakarrik berezia pertsona batentzat, izan nahiduzu bereziena.
O: Nik uste fideltasuna gaur egun ulertzen den bezala arazo hori ekiditzeko zerbait dela, konformismo maila bat duela.

GS: Zuen sexualitatearen garapenean unibertsitatea inflexio puntu bat izan al da? Zein aldaketa supostu ditu zuen bizitzan? Ligatzeko aukerak eskaintzen al ditu? Ikasle pisua, etxetik alde egitea, jende berria ezagutzea…
O: Nire kasuan kanpora ikastera joanda, ikasle pisuan egonda, mundu berri bat aurkitzen duzula. Ordurarte, 18 urte arte zure herrian zaude: ez dakit noren koadrilakoa zara, ez dakit norekin ibiltzen zara… Zara egin zaituzten modukoa ia ia. Unibertsitatera zatozen unean zu zeu egoera berri batean aurkitzen zara, inork ez zaitu ezagutzen, lagun berri pila bat dituzu… egoera aske batean aurkitzen zara eta zerorrek erabakitzen duzu. Gainera ligoteo pilo bat sortzen dira lehenengo ostegunetan, ikasle mugimenduan murgiltzen bazara jende piloa ezagutzen duzu… Baina tira, nik uste aukerak eskaintzen dituela, baina beste hainbat espaziok bezela.
E: Pertsonalki erreztasun dexente izan ditut gurasoen etxean egon naizenean, eta orduan ez dut horrenbesteko aldaketa bizi. Agian azpiegiturarena izan daiteke aldagai bat, baina ez dit hainbesteko aldaketa eragin, jende berri asko ezagutu dut, baina beste tokiren batean ere ezagutuko nuke ziurrenik.

GS: Zuek ikasle mugimenduko kide zarete eta zein da zuen ustetan gaur egun euskal ikasleriaren sexu gabeziarik handiena? Ezagutza falta, azpiegitura, komunikazioa…
O: Ni uste lehenik eta behin ezagutza falta azpimarratu behar dela, horrela egin gaituzte eta horrela gara. Baina iraultzaile garen heinean kontraesanak aurkitu behar ditugu eta mugak gainditzen saiatu. Norberak bere kabuz ikasi beharrekoa den zerbait eta ezagutza beharrezkoa da horretarako.
E: Egia da esaten dutela garaiak aurrera doazen heinean galderak geroz eta txikiagoak direla. Baina jarraitzen dugu guk geure kabuz ikasi beharrean, lagunartean eta abar. Ezagutza falta inportantea dela iruditzen zait eta komunikazoa ere bai, bestela espektatiba oso desberdinak sor daitezke eta txokeak eman daitezke harremanetan.

GS: Eskola ibiltaria bezalako aisialdi egitasmoek ligatzeko aukera eskaintzen dutela esan digute. Denok oporretan lasaiago gabiltzala, jendea ezagutzen dela… Egia al da eskola ibiltariak lortu duen fama hori?
O: Ez da nire kasua, ni ere fama hori ikasita joan nintzen eta ez zen hala gertatu. Baina egia esan bai, bikote asko ikusi ditut hortik sortzen eta azken eguneko parrandak kontakizun ugari ekartzen ditu.
E: Eskaintza horren zabala da, eta hain zaude giro atseginean… nik jende guztia gonbidatuko nuke eskola Ibiltaria ezagutzera. Besteak beste, lehenengo lerrotik ikusteko eta frogatzeko ea fama hori erreala den edo ez den erreala.

GS: Ildo beretik, komentatzen da hortik garai bateko ikasle mugimenduan bileren ostean ligatzeko ohitura zegoela, mahai azpian xirriak egiten zirela, herrialdetako arduradunek eskualdeetakoekin ligatzeko ohitura zutela… gure galdera da ea hauek denak herri kondairak diren edo militantziak ligatzeko aukerak ematen dituen.
O: Ez ez, kondairak ez dira, hori egia da. Urteetan zehar gertatu da eta bakarrik ikusi behar dira gure afarietan gertatzen dena. Asko ligatzen da IA-ko kideen artean, militantziak laguntzen du.

GS: Zergatik da hori, militantziak jendearekiko hurbiltasuna bultzatzen du, momentu bereziak konpartitzen dira, batzuetan oso onak eta besteetan oso txarrak…
E: Ematen dizu aukera jendea gertutik ezagutzeko eta horrek lotura batzuek sortzen ditu era batean edo bestean islatu daitezkeenak, eta batzuetan (gutxitan edo askotan) gertatu izan da.
O: Gainera nik uste dut ikasle mugimendua jende gehienarentzat lehenengo esperientzia dela arlo guztietan: lehenengo militantzia, lehenengo turnoa txosna batean… lehenengo esperientzia horiek esparru guztietara zabaltzen dira eta ligatzerako orduan ere bai. Jendearen hastapenak hor daude, eta hemendik urte batzutara denok gogoratuko ditugu geure ikasle garaiak, ezta?

GS: Ikasle Abertzaleetako kideak zarete zuek eta ezin bukatuko dugu elkarrizketa hau, Ikasle Abertzaleak taldeak ikasleen sexu-hezkuntza eskubideak bermatzeko duen planteamenduaz galdetu gabe. Ba al duzue planteamendurik?
E: Beno, eztabaida sakonak ditugu gai horren inguruan eta nik uste dut alternatiba bat aterako dugula laister, oso laister.

GS: Egoeraren azterketa egin al duzue?
E: Bai, egoeraren azterketa aurreko galderarekin loturik dator, gabeziak daude seguru eta saiatuko gara konponbidean jartzen.

GS: Posible al da aldarrikapenetako bat izatea ikasle egoitza publiko bat azpiegitura beharrak asetzeko? Etxebizitzaren asuntua nahiko gaizki dago…
E: Ikasle egoitza publikoa ez, publikoaK pluralean. Asko beharko dira, ostegun asko ditu urteak.

---