Zopizarren

Azaroaren 8a bitartean hainbat panel erakusgai izango dira arkupeetan.

Goierriko AHT gelditu! elkarlanak antolatuta, urriaren 31tik azaroaren 8ra bitartean Idiazabalen erakusketa antolatuko da. Plazako arkupeetan jarriko diren paneletan Abiadura Handiko Trenaren ibilbidea ezagutu eta izango dituen eraginak ikusi ahal izango dira.

Bestalde, azaroaren 8an Segurako kultur etxean gai honen inguruko hitzaldia eskainiko dute elkarlaneko kideek arratsaldeko 7etan.

Arano liburu berriarekin izalgo plazan. GOIERRIKO HITZA

Jaiotzez itsasondoarra eta aspaldidanik Idiazabalen bizi den Jon Arano idazleak bere hirugarren poema bilduma argitaratu du Elkar etxearekin. Atzo, Donostiako Elkar megadendan aurkeztu zuen Aranok jendaurrean “Zeruak eta ifrentzuak” izenburua duen liburua.

Beste komunikabideetan:
> Goierriko hitzan elkarrizketa: «Mila argazkik baino gehiago balio du hitz juxtu egoki batek»
> Diario Vasco: «Ez dut malditismoan amildu nahi, nahiz hortik dezente edan dugun»

Gaur arratsaldean Frantziako Poliziak lagun bat atzeman du Baionan. Atxilotutakoa Borxa Urberuaga Arano txometarra da.

BERRIA. Frantziako Poliziak Borxa Urberuaga Arano (1977) Gernika-Lumoko (Bizkaia) herritarra atxilotu du gaur arratsaldean Baionan. “Kalean zihoala kotxe bat gelditu eta kalez jantzitako bi polizi atera dira, eta ezer esan gabe segituan Borja harrapatu dute. Atxilotuta kotxean sartu eta joan egin dira”, esan du Askatasunak prentsa ohar batean. “Lekukoen arabera, atxiloketak bahiketa baten itxura izan du”.

Busturialdeko Hitza-ren arabera, Urberuaga beste batzuetan ere atxilotu izan dute poliziek. 2005ean bi urteko kartzela zigorra jarri zion Espainiako Auzitegi Nazionalak, berak ustez egindako pintadetan Agustin Ibarrola margolaria, Gernika-Lumoko zinegotziak eta ertzainak mehatxatu izana leporatuta.

Hiru urteko kartzela zigorra ere jasota dago, Muxikako (Bizkaia) alkate izandakoaren autoa ustez berak erretzeagatik.

Gaur Baionan elkarretaratzea egingo dute, Cinq Cantons plazan, 18:30ean hasita. Busturialdeko Askatasunak ere elkarretaratzera deitu du gaurko Gernikan, 19:30etan, Arrien aurrean.

Iaz hasi zen herriko Ikerketa Taldea Idiazabalgo argazki zaharren artxiboa osatzen. Orain jasotako argazkiei fitxa osatu eta informatizatu osatean ikusgai daude lehen tandan jasotako ia 500 argazki www.euskomedia.org webgunean. Ikusteko klikatu hemen.

Idiazabalgo herri sarrera 40. hamarkadan.

Kurtso berriarekin batera atal berriak eskainiko ditu Zopizarrenek. Gaurtik martxan da ZPZRN PERIE, zure iragarki laburren txokoa.

Zure iragarki laburren txokoa duzu hau. Edozer saldu, erosi, trukatu, eskaini… nahi duzula ere, horretarako aukera ematen dizu Zpzrn Perie-k. Errentan dauden etxeak, lan eskaintzak, arropak… denek dute lekua hemen. Bila zabiltzan hori hemen aurkituko duzu. Bidali zure iragarkia (argazkiak ere bidal daitezke) gurera: zopizarren@gmail.com

Naturgas enpresarentzat gasbidea egiteko lanak duela aste batzuk hasi ziren Idiazabalgo mendietan. 16 metroko zabalera duen lubakia irekitzeko lanak aurrera doaz Urbizu gaineko mendietan. Baserritarrek euren eskaera eta kexuak agertu dituzte gaur goizeko prentsaurrekoan.

Eneko Karreraren Adierazpenak

Gaur goizeko protesata Urbizu gainean. ZPZRN

Bizkaiko Golkoa besarkatzen duten herrialdeei gas hornidura ziurtatzeko helburua duen Euskadour gasbideko azpiegitura berriaren obrek aurrera darraite. Idiazabalen Urbizuko lur sailetan ari dira une honetan 16 metroko lubakia irekitzen eta bertan bildu dira gaur goizean kaltetutako hainbat baserritar eta lurjabe.

Eneko Karrera EHNE nekazal sindikatuko kideak adieraztera eman duenez, “Naturgasi jaso beharreko kalte ordainei egindako proposamen berriak erantzun lotsagarria izan du” gas enpresaren eskutik. Naturgasek baserritar eta lurjabeen eskakizunak bidezkoak direla onartu badu ere eta lanen 2. trazatuan (Zaldibiatik- Villabonara doana) eskakizunak kontuan hartu eta hauetara hurbiltzen saiatuko direla agindu duen arren, lehenengo fasean (Bergara eta Zaldibia artekoan) ez dela kalteordainetan aldaketarik izango esan dute. Kaltetuek argi utzi nahi izan dute kalteordainak jasota ez dutela aberasterik espero, orain 26 urte beste gasbide bat sartu zutenean jasotako diru berdina ari direla jasotzen eta izandako kalteengatik ordain duin bat baino ez dutela eskatzen. “Baserriko lurragengatik ordainduko dutena kostu guztiaren %1a izango da”.

Dirusari eskasez gain, gasbidea “baserritarrari gutxien interesatzen zaion lekuetatik” ari dela pasatzen salatu dute. “Hemen, baserriaren albo albotik… etorkizunari begira baserri inguruneak kondizionatuz”.

Aurrerapenaren izenean baztertuak

Bestalde, administrazioaren aldetik izandako jarreraz kexatu dira baserritarrak. “Beste arlo batzuetan erakusten duen interesik” ez dutela agertu azpimarratu dute. “Erabilera publikorako obraren izenpean, enpresa pribatu baten negozioa” defendatzen dela salatu dute. “Diru asko da hemen mugitzen dena, eta bitartean afektatuoi burla ari zaigu egiten”.

“Udaletxea askok baserritarren defentsarako interesik ez” agertu izana eta “enpresa bati nahi duen guztia egiteko ateak zabaldu eta pasabidea eman” zaiola salatu dute. Gasbideak herri txikiei ez diela onurarik ekarriko azpimarratu dute eta “herri handi eta industrialdeen intereserako, herri txiki eta baserritarren bizkar egindako infraestruktura” bat egiten ari direla. Alderdi polikoekin ere biltzeko saikera egingo dutela adierazi dute kaltetuek: “Gizarte honetan aurrerapenaren izenean batzuk baztertuak ari gara sentitzen”.

Albistea beste komunikabideetan:
>Gara
>Goierriko hitza
>Berria
>Diario Vasco

Soto del Realera eraman dute Batasuneko kidea, «talde armatuko partaide» izatea leporatu diote ; Idiazabalgo Udalean ez ohiko bilkuran landu dute gaia adostasunik lortu gabe

Garzon Auzitegi Nazionaletik ateratzen.

Hamabost minutuz deklaratu ondoren, Asier Imaz Batasuneko Mahai Nazionaleko kidea Soto del Real espetxean sartzeko agindu du Auzitegi Nazionaleko Baltasar Garzon epaileak. «Talde armatuko kide izatea» leporatu diote Imaz idiazabaldarrari, baita atzo auzitegian bere kabuz aurkeztu zen Gorka Diaz bilbotarrari ere. Bi kartzelatze horiekin 19 dira dagoeneko espetxeratu dituzten Batasuneko ordezkariak.

Goizean deklaratu zuen Asier Imazek Auzitegi Nazionalean, Madrilen. 11:50 inguruan amaitu zen deklarazioa hartzeko saioa, ordu laurden inguru iraun zuena.

Saioa 09:30ean zen hastekoa, baina atzeratu egin zen, trafiko arazoengatik abokatuek ezin izan zutelako garaiz iritsi. Imaz polizia-kotxe batean eraman zuten auzitegira, burua makurrarazita. Senitartekoei ez zieten utzi auzitegiaren kanpoan argazkiak ateratzen, eta identifikatu egin zituzten.

Fiskalaren eskaria aintzat hartu zuen epaileak, hau da, «talde armatuko kide» izatearen akusazioa, eta baldintzarik gabeko eta komunikatutako kartzelatzea. Asier Imazek ez zien erantzun ez Garzon epailearen ez eta Dolores Delgado fiskalaren galderei.

Espetxeratze agindua jaso ondoren, Imazen emazteak eta aitak ikusi ahal izan zuten idiazabaldarra, beiraz banatutako lokutorio batean, Auzitegi Nazionalean bertan. Zortzi minutu inguruan hitz egin zutela zehaztu zuten senitartekoek, eta adierazi zutenez «lasai» aurkitu zuten Imaz.

Operazioak jarrai dezake

Bestetik, Garzonek ateratako autoan adierazten da Beasaingo Arrano elkartea miatzea agintzeko zer arrazoi izan zuen. Epailearen arabera Imazen «ohiko biltoki delako» agindu zuen elkartea ikuskatzea eta ondoren prezintatzea. Astelehen gauean bertan miatu zuten soziedade gastronomikoa. «Batasunaren barne-buletin batzuk» eraman zituzten handik, autoan adierazten denez. Auto osoa hemen

Gorka Diaz Batasuneko Mahai Nazionaleko kidea bere kabuz aurkeztu zen Auzitegi Nazionalean atzo. Atxilotze agindua emana zegoen Diazentzat ere, Segurako bileran parte hartu zuela eta. Ezarritako orduan deklaratzera joan zenean atxilotu zuten, eta ondoren kartzelatu egin zuten.

Segurako batzarraren ondotik poliziak identifikatutako kide guztiak daude atxilotuta. Urriaren 4ko gauean bertan atzeman zituen Espainiako Poliziak gaur egun kartzelan dauden 17 lagun; Imaz astelehenean atxilotu zuten Beasainen, bere etxetik irteterakoan. Azken kasua Diazena da, atzo auzitegian bertan atxilotu zutena.

Hala ere, Garzonek berak atzo aurreratu zuen Batasuneko beste ordezkari batzuen aurka ekintza judizialak burutzea «aztertzen» ari dela. Igandean Gara egunkarian Mahai Nazionalak argitaratutako komunikatua eta Batasuneko beste arduradun batzuen adierazpenak hartu ditu erabaki horren oinarri gisara. Bestetik, Seguran 23 lagun atxilotu ondoreneko astebetean «kale indarkeriak %465,2 gora egin» duela adierazi du epaileak.

IDIAZABALGO UDALEAN ADOSTASUNIK EZ

Ez ohiko plenoa egin zuten atzo Idiazabalgo Udalbatzako 9 zinegotzik (Izal Baiko 5ek -bi falta ziren-, EAE-ANVko 4k). Gai bakarra Asier Imazen atxiloketa zen, EAEk mozio bidez aurkeztua; bozketan ez zen onetsi (5 boto kontra, 4 alde).

Lau puntuko agirian, «euskal independentismoaren eta Euskal Herriaren aurkako eraso» gisa jo ditu EAEk Imazen eta Batasuneko beste ordezkarien atxiloketak, «irmoki» salatuz. Berehala aske uzteko eskatu zuten, eta «independentismoaren aurkako kriminalizazioa eta jazarpena» geratzeko exijitu. «Demokraziarik ez» dagoela, euskal herritarren eskubideak «urratu» direla eta «errepresioaren aurrean jarrera tinkoa» hartzeko eskatu zion Udalari.

Bestetik, «marko demokratikoaren» beharra azaldu eta Hego Euskal Herriko biztanleei «libreki eta demokratikoki erabakitzeko eskubidea zor» zaiela gehitu zuten, «proiektu politiko guztiak, independentzia barne, bideragarriak egingo dituen marko batean dago gatazkaren konponbidea». Azken puntuan mobilizazioetara herritarrei dei egiteko eskatu zion EAEk Udalari.

Izal Baik lau puntuko beste erantzuna aurkeztu zuen. «Asierri, sendiari eta gertukoei elkartasuna» adierazi ondoren, atxiloketa Espainiako Gobernuaren «egokiera politikoan» kokatu zuen. Egoera hori eta Alderdien Legea «salagarria iruditzen» zaiela aipatzen du agiriak. Eskubide politiko eta zibilak errespetatu behar direla esan ondoren, «giza eskubide guztiak errespetatzea ezinbestekoa» dela adierazi zuten; «Asierren eta bere kideen atxiloketak bezala, ETAren lehengo asteko hilketa saiakera eta etengabeko kale borroka ekintzak» gaitzetsi zituzten.

Ildo horretatik, atxiloketak gaitzestea «zilegi» dela dio, «baina zilegitasuna zalantzan jartzen da urraketa ororen, eta bereziki bizitza eskubidearen urraketaren aurrean ez bada maila berean jokatzen». Azkenaldiko gertaerekin Idiazabal eta euskal gizartea «nazkatuta» daudela dio Izal Baik.

Atzo gauen Beasaingo Arrano taberna eta Imazen etxea miatu zituen Espainiako Poliziak

Atzo iluntzean manifestazioa egin zen Idiazabalgo kaleetan.

Herenegun goizean Beasaingo etxetik ateratzen ari zela atxilotu zuten kalez jantzitako zortzi poliziak Asier Imaz Batasuneko kidea, Espainiako Auzitegi Nazionaleko Baltasar Garzon epailearen aginduz. «Batasuneko instituzio arduraduna» izatea egozten dio Garzonek. Etzi deklaratuko du Imazek Auzitegi Nazionalean.

Beasainen atxilotu ondoren, Espainiako Poliziak Donostian duen komisaldegira eraman zuten Imaz. Gau partean, berriz, Beasaingo Arrano elkartea miatzera joan zen Espainiako Poliziak, Imaz berarekin zuela. Pare bat orduz aritu ziren tabernaren azpiko aldean dagoen elkartea ikuskatzen. Azkenean elkartea zigilatu egin zuten poliziek, haiekin zen epaileak hala aginduta.

Elkartearen miaketa bukatu ondoren Imazen etxea miatzera joan ziren poliziak. Etxea goitik behera miatu, eta etxe guztia poliziaz beteta zegoela. Bertan ziren senideek adierazi dutenez «Ez dute ia ezer eraman, grabatutako film batzuk dituzten CD batzuk besterik ez». Etxearen miaketa epailea bertan zela egin zutela adierazi dute, eta «tratua zuzena» izan zela. «Hala ere, gaua luzea eta tentsio handikoa izan zen».

Senideak Imazekin hitz egiten saiatu ziren, baina poliziek esan zieten «inkomunikatuta» zegoela eta ezin zuela inorekin hitz egin. Imaz eskuburdinak jarrita eduki zuten haren etxea miatzen zuten bitartean, eta komunera joateko bakarrik kendu zizkioten. Senideek diotenez, atzo, 07:00etan eraman zuten Asier Imaz Madrilera.

«Atxiloketa ilegala»

Imazen abokatu Jone Goirizelaiak atzo salatu zuen Imazen eta Batasuneko gainerako mahaikideen atxiloketa «legez kanpokoa» dela eta «eskubideak urratu» direla. Goirizelaiak epaitegiaren «informazio eza» ere salatu zuen, eta nabarmendu zuen «prentsaren bidez jakin» zutela akusazioen berri. Atzo arratsaldean Batasuneko beste kide baten bila zebiltzan poliziak Bilbon.

Imaz inkomunikatuta dagoen bitartean Idiazabalen eta Beasainen mobilizazioak egin dituzte. Ostegunean, 19:00etan, ez ohiko osoko bilkura egingo dute Idiazabalgo udaletxean.

Batasunako kide den idiazabaldarra gaur goizean atxilotu dute etxeko atarian Garzonen aginduz. Arratsaldean manifestazioa izan da Idiazabalgo kaleetan.

Asier Imaz Batasuneko Mahai Nazionaleko kidea atxilotu dute Beasainen. Etxeko atarian atzeman dute kalez jantzitako zortzi poliziak, goizean. Urriaren 4an Batasunaren 23 kide atxilotu zituen Espainiako Poliziak, eta haietatik 17 kartzelara bidali zituen Garzon epaileak.

Asier Imaz Batasuneko Mahai Nazionaleko kidea atxilotu dute gaur Beasainen, etxeko atarian, 11:30ean. Kalez jantzitako zortzi poliziak atzeman dute. Idiazabalgoa da Imaz, baina Beasainen bizi da.

Joan den urriaren 4an Seguran Batasunaren kontra operazioa egin zutenetik bilatzeko eta atxilotzeko agindupean zegoen, legez kanpoko alderdiaren bileratan parte hartu zuelakoan.

Batasunaren 23 kide atzeman zituen orduan Poliziak Seguran eta Olaberrian, “ETAren kide” izatea leporatuta. Baltasar Garzon Espainiako Auzitegi Nazionalaren epaileak agindu zuen operazioa.

Manifestazioa Idiazabalen

Asier Imaz idiazabaldarraren eta Batasuneko beste hainbat kideren atxiloketak salatzeko, protesta ekitaldiak egin dira gaur iluntzean. Ezker abertzaleak deituta, dozenaka lagun bildu dira iluntzeko zazpietan Idiazabalen, Imazen jaioterrian. Manifestazioa egin da, Axier eta besteak askatu, independentziari ateak ireki lelopean. Iluntzeko zortzietan, berriz, Beasaingo Zubimuzu plazan egin dute elkarretaratzea.

Asteburu honetan, urriaren 6an, hasiko da urtero egiten den futbitoko txapelketa, larunbat honetan arratsaldeko 4etatik 8etara izango dira estreineko partidak.

Aurten 7 talde lehiatuko dira, besteak beste Etxezar, Parrow, Barrigas, Haitow, Txantxo, EAK eta Tuberias, nor baino nor gehiago.

Astebururo izango duzue gertatutakoaren berri, hemendik SanBlasak arte, Idiazabalgo Gaztetxeko weblogean.

Zorte on denei!